KIDAPAWAN CITY -- Personal nga atraso ang gitan-aw nga motibo sa pagpamusil sa duha ka tawo alas 5 sa hapon niadtong adlaw nga Sabado, Nobyembere 16, sa probinsiya sa Cotabato.

Giila ang napatay nga si Abil Buka Sambatuwa, 25 anyos, ulitawo, nagpuyo sa Barangay Kitulaan, Carmen, North Cotabato.

Naila sab ang naangol nga si Horhanie Yusop Sandigan, 18 anyos, estudyante ug nagpuyo sa Sitio Mantawil, Barangay Tacupan, Carmen.

Gibutyag ni Cotabato Police Provincial director Colonel Maximo Layugan nga samtang sakay ang mga biktima sa motorsiklo nga gimaneho ni Sambatuwa gikan sa Carmen public market pauli na sa ilang balay, pag-abot nila sa Sitio Onse Barangay Tacupan, kalit lamang silang girakrakan sa wala mailhing mga armadong lalaki gamit ang kalibre .45 nga pistola.

Nanibat sab dayon ang mga namusil sakay sa tulo ka motorsiklo paingon sa hilit nga dapit sa Carmen.

Dead on the spot ang drayber sa motor nga si Sambatuwa nga naigo sa iyang ulo samtang samdan ang iyang pasahero nga estudyante.

Posibleng si Sambatuwa lamang ang target sa mga suspetsado og naangin lamang ang estudyante.

Sa kasamtangan, ang kapulisan sa Carmen Cotabato ang padayon nga nag-imbestigar sa pagpamusil sa mga biktima.