USA ka tawo ang patay samtang daghan ang naangol sa nahitabong disgrasiya Biyernes sa buntag, Mayo 20, 2022, didto sa National Highway sa Barangay Darong, Sta. Cruz, Davao del Sur.

Sa inisyal nga imbestigasyon sa kapulisan sa Sta. Cruz Municipal Police Station, giingong miangkon ang drayber sa wing van nga si Dave Lumbab, 22, taga Damolog, Bukidnon nga siya nakatulog samtang nagmaneho.

Niya pa nga nakatulog kini maong nadaro niini ang pipila ka motorsiklo, lakip na pipila ka tindahan kilid sa dalan nga misangko sa pagkalas sa kinabuhi sa usa ka Edwin Stephen Arellano, 22, taga Puan, siyudad sa Davao.

Dugang imbestigasyon nasayran nga namarada daplin sa dalan ang mga motor aron mamainit samtang ang wing van nga gikan sa Bukidnon padung Davao City ang midaro sa painitan.

Daling miresponde ang awtoridad ug rescue teams diin gidala sa bay tambalanan ang mga naangol.

Sa usa ka interbyu, ang drayber sa wing van nangayo og pasaylo sa hitabo nga nakatagpilaw siya nga miresulta sa aksidente.

Gikustodiya na ang drayber sa wing van samtang gipahiluna na sa mga kabanay ang namatay sa hitabo.