SA MGA nakadawat og mga official text messages gikan sa Department of Social Welfare and Development (DSWD) Davao Region, padayong kining nanghatag sa ayuda alang sa Educational Assistance ubos sa Assistance to individuals in crisis situations (AICS) program sa maong ahensiya.

Niadtong Sabado, gihimo ang paghatag sa DSWD Davao sa AICS Educational Assistance sa mga benepisyaro nga nakadawat sa official text messages.

Duha ka mga payout venues diin una mao ang sa mismong Regional Office partikular sa Crisis Intervention Section ug CBSS, ug ang ikaduha sa Rizal Elementary School nga parehong anaa sa Damoso Suazo Street, Poblacion, Davao City ug ang Provincial Operations Office sa Davao del Norte Province nga may payout venue sa Energy Park sa Tagum City.

Niadtong Dominggo sab mihimo og payout ang mga probinsiya sa Davao del Sur, Davao de Oro ug Davao Oriental.

Una niini, temporaryong gihunong ang pagpangdawat og mga application gumikan sa pagdasok sa mga tawo sa maong ahensiya.

Gipasabot sa ahensiya nga magpadayon ang pagpangdawat diin hulaton lang ang anunsiyo sa ilang official Facebook page nga DSWD Davao.

Nasayran nga ang mga nakadawat og mga text message mao kadtong mga application form nga gipanghulog sa drop box sa maong buhatan sa wala pa temporaryo nga giundang ang pagpangdawat sa application form. (Jeepy P. Compio uban sa taho sa DSWD Davao)