KIDAPAWAN CITY -- Nang apud-apod si Presidente Rodrigo Duterte og pagkaon lakip na tabang pinansiyal sa mga biktima sa linog adlaw nga Lunes sa probinsiya sa Cotabato.

Ang pagpanghatag og hinabang gipahigayon sa M’lang National High School sa M'lang, North Cotabato.

Giubanan ang Presidente nila Senador Bong Go, Department of Interior and Local Government (DILG) Secretary Eduardo Año, Department of Social Welfare and Development (DSWD) Secretary Rolando Bautista, Minda Chair Manny Piñol ug National Housing Authority (NHA) General Manager Marcelino Escalada Jr.

Ang tabang direkta nga gidawat sa mga biktima sa linog sa M’lang, Tulunan, Makilala, Magpet ug Kidapawan City.

Sa pakighinabi sa Presidente sa liboan ka pamilya nga biktima sa kalamidad, nanghinaot siya nga makunhuran ang ilang gisagubang nga problema sa tabang sa gobyerno.

Gipasalig ni Duterte sa mga biktima sa linog nga sila padayon nga tabangan sa kagamhanan hangtud nga sila makabangon og magsugod sa bag-ong paglaum nga manginabuhi nga halangdon.

Giseguro sa Presidente nga mabatyagan sa mga biktima sa linog ang tabang sa gobyerno sa pagsugat sa Bag-ong Tuig 2020.

Masaligon ang Presidente nga ang iyang administrasyon magpabilin nga matinud-anon sa saad nga “kaisug ug kabalaka” alang sa tanan, labi na ang mga nanginahanglan.

Gitahasan sab ni Duterte si Escalada nga paspasan ang housing project sa mga biktima sa linog nga nawad-an og balay.

Nanawagan ang presidente alang sa panaghiusa ug pag-atubang sa Bag-ong Tuig uban ang paglaum. (Edgar E. Fuerzas)