PIKIT, North Cotabato -- Rido o dumot sa pamilya ang gilantaw nga motibo sa pagpatay sa usa ka estudyante alas 7:05 sa buntag Huwebes, Oktubre 10.

Giila ang biktima nga mao si Rasul Salaban, 21, estudyante sa Cotabato Foundation College of Science and Technology (CFCST) sa maong lungsod.

Matud ni Pikit chief of police Captain Mautin Pangandigan nga naglakaw ang biktima sa Barangay Batulawan sa lungsod ug paingon na nga mosulod sa tulunghaan.

Apan giduol sa duha ka wala mailhing lalaki nga sakay sa motorsiklo ug gipusil gamit ang kalibre .45 nga pistola.

Abtik sab nga miikyas ang mga suspek paingon sa ngiob nga bahin sa Pikit.

Patay on the spot ang estudyante nga naigo sa ulo, nawong ug kilid nga bahin sa lawas.

Gihulagway nga mga suspek nakasulo-ob og helmet ug naka-jacket hinungdan nga di mailhan.

Imbestigasyon sa kapulisan sa Pikit Municipal Police Station nagpadayon. (Edgar E. Fuerzas)