BAROBO, Surigao del Sur -- Sikop sa hiniusang puwersa sa awtoridad ang giingong founder sa usa ka investment scheme human milayas dala ang dako nga kantidad sa salapi sa mga money investors.

Sa impormasyon gikan sa National Bureau of Investigation (NBI) Davao Region, nasikop si Ryan (apilyedo gitago), hamtong ang pangedaron.

Wala na kasibat ang suspetsado human nakorner sa Barobo Municipal Police Station ug sa NBI-11 Miyerkules sa kaadlawon.

Giingong gilayong mitago ang suspek human nabulabog ang ilang investment schemes nga (times 2) nga interest sa kapital sud sa usa ka semana.

Hunyo 15, nagkagubot ang mga investors nga midangop sa Tagum City Police Station kinsa nagpa-blotter human migula ang impormasyon nga nisibat na ang founder niadtong Hunyo 10.

Martes sa hapon, nagkatag sa social media ang usa ka mensahe diin nagkanayon nga usa ka “scam” ang maong scheme.

Nagpakita sab ang mensahe og pipila ka mga investment schemes sa Tagum City sa update niini luyo sa pagpahigayon og imbestigasyon sa awtoridad.

Hinuon wala pay balidasyon ang maong mensahe apan sagad sa mga investors nangutana sa sitwasiyon sa ilang giapilan nga investment schemes sanglit ang mga agents wala na sab makontak.

Sa kasamtangan, padayon ang gihimong imbestigasyon sa awtoridad subay sa mando ni Pangulong Rodrigo Duterte.