NAKADAGAN man ug naluwas sa posibleng kamatayon ang anak, apan ang amahan wa makalingkawas ug natusak-tusak sa mga bala dihang sila gipamusil sa wala mailhing mga armado sa Purok 7, Sitio Kabasaran, Barangay Mt. Diwata, Monkayo alas 5 sa hapon, Sabado, Septiyembre 19, 2020.

Ang biktima giila nga si Arsenio Bacquiao alyas Boy, 53 , minyo, mag-uuma ug molupyo sa Purok 6, Barangay Mt. Diwata.

Base sa inisyal nga imbestigasyon, nasayran nga ang biktima miadto sa iyang umahan kauban ang anak, dihang gipusil sa upat ka wala mailhing mga armado gamit ang tag-as nga kalibre sa armas.

Ang biktima nakahiagom og samad pinusilan sa agtang ug walang abaga nga miresulta sa hinanaling kamatayon samtang ang iyang anak nakahimo pagdagan palayo ug naluwas sa kamatayon.

Giingon nga ang maong lugar diin nahitabo ang krimen halayo sa sentrong bahin sa lungsod ug ang maong dapit sagad makit-an ang mga sakop sa New People's Army.

Ang patay'ng lawas sa biktima gihaya karon sa ilang panimalay.

Padayon pang gisusi sa kapulisan ang motibo sa krimen lakip ang matuod nga bansagon sa mga suspek.