DISMAYADO ug dako ang pagmahay sa usa ka edarang lalaki human gitangag ang iyang P150,000 ug susi sa sakyanan sa iyang nahibalag nga commercial sex worker sa usa ka lodging inn sa Legaspi Street, Corner San Pedro, Davao City.

Niadtong miaging adlaw, gilayong nagpa-blotter sa kapulisan sa San Pedro Police Station si alyas Gregorio, 52-anyos, minyo, tag-iya og farm ug nagpuyo sa Dalawinon, Magsaysay, Davao del Sur.

Nasayran nga miadto sa Davao City si Gregorio aron mamalit og dugang gamit alang sa iyang farm, apan nakaagi kini sa Legaspi Street ug giingong nadani sa kidhat ug sa pangamay sa babayeng seksi alas 8:30 sa buntag.

Wala nagduha-duha ang biktima kinsa nangita kini'g ka-parkingan sa iyang sakyanan ug miuban sa babaye, nag-check in sa lodging inn.

Pagsulod nila sa kuwarto, taud-taod miingon ang babaye nga magkaguray na sila ug iyang gimandoan si Gregorio nga mamunas.

Sa pagpamunas ni Gregorio, gibiyaan niini ang iyang sling bag sa kama, diin naa sud sa bag ang P150,000, mga ID ug susi sa sakyanan.

Daw nahugno ang kalibutan ni Gregorio dihang wala na ang iyang sling bag, gitangag na sa babaye.

Suma sa frontdesk, kalit suma pa nga migawas ang babaye ug wala nila nailhan sanglit si Gregorio ang naka-booking sa room.

Nagpungasi nga nagbaktas na lang padung sa San Pedro Police Station si Gregorio ug gilayong gipanubayan sa General Investigation Section sa maong istasyon ang hitabo.

Wala pa mipagula og progress report ang San Pedro police labot sa insidente.