NAKATAKDANG mag-abot sa Barangay 23-C ang reklamante nga 65-anyos nga ginang ug ang 34-anyos nga iyang silingan human gi-tsismis nga siya usa ka wakwak.

Hilabihang suko-a ni Gregoria (bansagon gitago), 65-anyos, nagpuyo sa Isla Verde, Barangay 23-C, dihang gipakatap sa ilang silingan nga usa siya ka wakwak.

Midangop sa Sta. Ana Police Station si Gregoria aron ipatawag sa barangay ang iyang silingan nga si Ellen (dili tinuod nga ngalan), kay nahimong sumsuman sa ilang lugar ang maong istorya.

Sa impormasyon nga nakalap sa Superbalita Davao gikan sa maong lugar, kalkag kaayo og buhok, tag-as og kuko ug isog kaayo motan-aw kining si Gregoria sa iyang mga silingan.

Giingon sab nga dili kaayo makita sa iyang mga silingan nga mogawas sa ilang balay si Gregoria kon adlawan.

Nasayran gikan sa kasaligan nga impormante nga walay anak ang maong 65-anyos kinsa upat na katuig na nga byuda human namatay ang iyang bana. Sa Tibungco, Bunawan District sa iyang mga igsuon lamang siya tigpangayoan og pagkaon.

Bisan paman sa pagsaway sa pamarog sa reklamante, pursigido kining moatubang sa barangay aron malimpyo ang iyang pangalan sa ilang lugar.

Ang maong reklamo anaa na sa general investigastion Section sa Sta. Ana PNP aron didto sila maghusay.