SULTAN KUDARAT -- Arang-arang na ang panglawas sa usa ka sakop sa media nga gipusil sa Tacurong City niadtong miaging bulan.

Segun sa pamilya ni Benjie Caballero, station manager sa Radyo ni Juan sa dakbayan sa Tacurong, nga makasulti na siya ug gitakda na nga ibalhin sa pribado nga lawak sa usa ka balay tambalanan.

Apan, gumikan sa dako nga galastusan sa ospital nagpatabang ang pamilya ni Caballero sa mga kaila niya ug mga kauban sa buhat.

Dunay mga tawo na nga gitudlo si Caballero nga posibleng dunay kalabutan sa pagpusil kaniya, apan dili pa ipagawas sa publiko gumikan nagpadayon pa ang imbestigasyon awtoridad.

Ang galastusan sa hospital ang gisagubang sa buhatan ni Presidential Task Force on Media Security director Joel Egco.

Kahinumdoman nga samtang nag-atang og traysikel ang biktima nga iyang masakyan paingon sa iyang trabahoan, kalit lang mibutho ang riding-in-tandem dayon gipusil ang biktima gamit ang kalibre .45 nga pistola.

Pinaka-ulahi nga giutingkay ni Caballero sa iyang programa mao ang paluwagan system sa kapulisan sa Soccsksargen.

Sa kasamtangan, ang kapulisan sa Tacurong City ang dunay mga person of interests nga gi-imbestigahan nga posibleng dunay kalabutan sa hitabo. (Edgar Fuerzas)