BANSALAN, Davao del Sur -- Milingkod na isip acting vice mayor ang numero unong konsehal sa Sangguniang Bayan (SB) sa lungsod Lunes, Abril 22, si Julian Albores nga mao na say nahimong presiding officer atol sa sesyon sa Konseho.

Si SB Secretary Jun Romero maoy nibasa sa suwat nga gipaabot ni acting Mayor Edwin Reyes ngadto sa SB aron hatagan siya og otorisasyon nga makalagda na sa mga dokumento apil ang mga tseke ug ubang transaksiyon sa munisipyo.

Nasayran nga nadamay na ang suweldo sa mga opisyal ug kawani sa munisipyo human wa motugot ang mga konsehal nga kaalyado sa gisuspende nga si Mayor Quirina Sarte nga hatagan si Reyes og pagtugot.

Apan sama sa gihapon gibasura ang suwat ni Reyes sa mga kaalyadong konsehal ni Sarte nga sila si Konsehal Rodolfo Cartin, Peter Menguito, Wilan Granada, ABC Pres. Mindanito Mabanag ug SK Federation Noriel Zamora nga pag-umangkon sa mayor.

Wa sab mihatag og rason ang mga konsehal sa ilang pagdumili sa otorisasyon sa acting mayor.

Tungod sa nahitabo, padayong naapektuhan ang mga transaksiyon sa munisipyo ug suweldo sa mga kawani niini. (Orlando B. Dinoy)