KIDAPAWAN CITY -- Unom sa 32 ka mga kinasal atol sa gipahigayon nga Kasalan ng Bayan alas 11:00 sa buntag niadtong Huwebes, Oktubre 29, sa Barangay Camutan, Antipas, North Cotabato pulos mga kanhi rebeldeng New People's Army (NPA).

Sumala ni alyas Tiroy, kinsa usa sa mga nahisgutan, nga mibalik sila sa sabakan sa balaod gumikan sa gugma sa ilang mga hinigugma o uyab nga ilang gipakaslan kay di sila buot nga matumpawak ang ilang umaabot nga mga anak sa kalihukan nga walay pulos.

Ang "Kasalan" inisyatibo sa lokal nga panggamhanan sa Antipas nga gipangulohan ni Mayor Igidio Cadungon ug Vice Mayor Cris Cadungon.

Moabot na sa 139 nga mga NPA nga nagagikan sa Barangay Camutan ang mibalik sa sabakan sa balaod.

Dako ang pasalamat ni Barangay Kapitan Romy Amoloy kang North Cotabato Governor Nancy Catamco sa pagdala sa Joint National Task Force to End Local Communist Armed Conflict (NTF-Elcac) sa ilang dapit.

Ilawom sa Elcac, daghang mga walhong grupo ang misurender ug natabangan sa kagamhanan.

Nakasentro ang Elcac program sa mga dapit sa probinsiya nga gisalagan sa mga komunistang NPA. (Edgar E. Fuerzas)