GITANGGAL sa Davao City Police Office (DCPO) ang hepe sa Special Operations Group (SOG) samtang nagpadayon ang imbestigasyon bahin sa giingong reklamo sa pagpangulata sa pulis.

Gibutyag ni DCPO Director Police Colonel Kirby John Kraft kagahapon nga si SOG chief Police Captain Nolan Tagsip gibalhin og buhatan sa city director samtang padayon ang imbestigasyon human usa ka police auxiliary nailhan nga si Louie Hermosilla nag-akusar kaniya nga nagkulata samtang gisukit-sukit.

Sumala kang Kraft, si Hermossilla nagtrabaho isip police auxiliary ubos sa DCPO sud na sa tulo ka tuig.

Sumala sa taho sa Sasa Police Station commander, si Hermosilla gikonsidera isip "person of interest" sa nagpadayon nga imbestigasyon human nakita sa closed-circuit television (CCTV) footage duol sa crime scene.

Kahinumdoman nga niadtong Hunyo 8, usa ka 62 anyos nga retiradong seaman gipusil patay sa wala mailhing suspek ug gitangag ang iyang mga kagamitan sa Crystal Meadows, Sasa, Davao City.

Base sa taho sa RMN dxDC Davao, ang pamilya sa biktima nidangop sa ilang istasyon aron nga mangayo og tabang sa gidangatan ni Hemosilla sa mga kamot sa pulis.

Nasayran nga ang police auxiliary pormal nang nagpasaka sa iyang reklamo ngadto sa National Bureau of Investigation-Southern Mindanao Regional Office batok kang Tagsip og physical injury nga nagsupak sa Republic Act o Ethical Standards of Public Officers and Employees sa kagamhanan. (Juliet C. Revita)