NABUNTURAN, ComVal Province -- Sikop ang gikonsiderang number 6 ug idlas nga drug pusher sa Davao Region human sa gipahigayon nga drug bust, sa Purok 2-B, Barangay Cabidianan, alas 10:50 sa buntag, Huwebes, Enero 24.

Ang suspek giila sa kapulisan nga si Erik Muga, 42, kinsa nakuhaan og upat mga ka pakite sa gituohang shabu atol sa hiniusang puwersa sa Philippine Drug Enforcement Agency (PDEA)-Davao Region, Provincial Intelligence Branch-Compostela Valley Police Provincial Office ug Nabunturan Municipal Police Station.

Segun sa taho sa kapulisan ang suspek maoy number 6 sa Top 10 drug priority target list sa regional level.

Sumala pa nga dugay nang gipanid-an sa otoridad ang ilegal nga lihok sa suspek apan idlas kini.

Usa ka nagtakuban nga poseur buyer ang mipalit og druga human sa natigayong transaksyon sa suspek gamit ang P1,000 nga markadong salapi.

Dihang natunol na ang droga bugti sa salapi, gilayong giposasan ang suspek. Narekober gikan sa posisyon sa dinakpan ang usa ka dakong pakite sa shabu ug lakip sa narekober ang lain pang pito ka mga medium size nga pakite.

Narekober sab gikan sa posisyon sa dinakpan ang P1,000 nga marked money ug laing siyam ka buddle money ug cellphone.

Ang dinakpan gibalhog na sa prisohan kinsa pasakaan og kasong pagsupak sa Republic Act 9165 kon Comprehensive Dangerous Drugs Act of 2002 didto sa korte.