MAGUINDANAO PROVINCE -- Lain na sab nga Improvised Explosive Device (IED) ang nakaplagan daplin sa national highway alas 4:15 sa hapon niadtong Dominggo.

Nasayran nga nakadawat og taho gikan sa mga sibilyan ang Maguindanao Police Provincial Office bahin sa IED nga nakaplagan daplin sa dalan didto sa Barangay Macaguiling, Sultan Kudarat sa probinsiya.

Sulti ni MPPO director, SSupt. Magzsali Mukaram nga abtik nga nagresponde ang mga sundalo ug pulis, uban sa mga sakop sa Explosive Ordnance Disposal Team ug ilang gikurndon ang dapit ug gidepyos kini.

Nasayran sab nga ang IED gama sa usa ka bala sa 81 mm mortar nga dunay 9 volts battery ug cellphone isip triggering mechanism.

Grupo ni Shiek Esmail Abdulmalik alyas Kumander Abu Toraife sa Bangsamoro Islamic Freedom Fighters (BIFF-ISIS Inspired Group) ang gitudlo nga maoy nagbilin sa bomba sa dalan.

Una nang gitumbok sa militar nga punting sa mga terorista nga mamomba atol sa plebisito sa Bangsamoro Organic Law (BOL). (Edgar E. Fuerzas)