DAVAO DE ORO -- Nagkadaiyang mga ilegal nga mga pabuto (firecrackers) ang nakumpiska sa kapulisan sa Barangay Elizalde, Maco alas 12:30 sa tungang gabii, Dominggo, Disyembre 29, 2019.

Subay sa report, nagpahigayon og pag-responde ang Maco Municipal Police Station sa giingong mga ilegal nga pabuto nga hitak nga gibaligya sa nahisgutang dapit.

Pag-abot sa lugar, wa’y nadakpang mga namaligya human nakahimo sa pagsibat dihang natimahoan ang nagsingabot nga mga pulis.

Hinuon, nakumpiska sa kapulisan ang 130 ka mga Kwitis, 50 ka Whistle Bomb, lima ka Fountain, upat ka aerial pyrotechnic ug upat ka rolyo nga Judas Belt nga gibana-banang nagkantidad og P5,000.

Samtang sa lungsod sab sa Mawab, duha ka Jumbo Garden in Spring, tulo ka Red Wave ug duha ka Atomic Angel nga mga firecrackers nga gibanana-banang nagkantidad og di muobos sa tulo P3,000 ang nakumpiska sa mga pulis atol sa gilusad nga operasyon sa Purok 1, Barangay Poblacion sa maong lungsod.

Ang nakumpiskang mga ilegal nga pabuto gikustodiya sa kapulisan alang tukmang disposasyon.

Sa Davao City Police Office (DCPO), naglibot-suroy ang mga pulis sa mga sidewalk aron sa paneguro nga wala gayo'y mamaligya og pabuto subay sa dul-an baynte katuig na nga pagpatuman sa firecracker ordinance sa maong siyudad.