DUHA ka mga negusyante ang gipangsikop sa Davao City Field Unit (DCFU) sa Criminal Investigation and Detection Group (CIDG) sa rehiyon sa Davao human nasayrang ilegal nga namaligya, nag-refill og mga Liquefied Petroleum Gas (LPG) products.

Mga dinakpan mao sila Mervin Tiban Jose, 35 anyos, minyo, nagpuyo sa Nuro Poblacion, Barangay Upi, Maguindanao, ug Daniel Lawan Datuwata, 21 anyos, nagpuyo sa Darugao sa nahisgutan gihapong barangay ug probinsiya.

Nasikop ang mga dinakpan subay sa Oplan Ligtas nga direktiba ni Presidente Rodrigo Duterte.

Gilayong nagkahiusa ang nga yunit sa mga awtoridad sa paghimo og operasyon nga gipangunahan sa hepe sa DCFU-CIDG-Davao, Police Major Milgrace Cajes Driz, CIDG-RFU-Davao, Sta. Ana Police Station ug Department of Energy (DOE), hinungdan sa pagkasikop sa duruha didto sa Tahimik St., Barangay Agdao Proper, Davao City, Enero 12, 2021.

Sa pagdawat sa duha sa marked money, gilayon silang gipangposasan.

Nakuha sa ilang posisyon ang nagkadaiyang klase sa tangke sa LPG, resibo ug flyers.

Mga nakumpiska nga ebidensiya anaa sa Sta. Ana police samtang gikustodiya na sab ang mga suspek aron pasakaan og kaso didto sa korte. (Jeepy P. Compio)