GIKALISANG sa mga sibilyan ang pagbusikad sa granada nga giitsa sa wala mailhing mga suspek sa istasyon sa pulis alas 7:05 sa gabii, Miyerkules, Abril 28, sa Carmen, North Cotabato.

Sumala kang North Cotabato Provincial Police Office Director Colonel Henry Villar nga duha ka wala mailhing lalaki nga sakay og motorsiklo ang miitsa'g granada atubangan sa Carmen Municipal Police Station (MPS) sa Barangay Poblacion sa nahisgutang lungsod.

Abtik sab nga misibat ang mga suspetsado dungan sa pagbuto sa eksplosibo. Maayo na lang kay way naigo nga mga pulis ug sibilyan, apan di masukod ang gibati nilang kahadlok ilabi na nga atbang lang sa municipal plaza ang Carmen MPS.

Dako ang pagtuo ni Carmen Mayor Moises Arendain nga posibleng target sa granada ang Carmen MPS gumikan sa gipalig-on nilang operasyon batok kriminalidad ilabi na ang gidiling druga.

Giukoy na sa mga pulis sa Carmen MPS ang mga suspek aron nga madakpan. (Edgar E. Fuerzas)