MAGSAYSAY, Davao del Sur -- Baynte sa 22 ka mga barangay sa lungsod ang nakadawat og mga ekipo ug sakyanan isip kabahin sa pagpangandam alang sa bisan unsang kalamidad nga moabot.

Gikanayon ni Mayor Arthur Davin nga ang pagpalit sa mga ekipo maoy paagi aron daling makaresponde ang mga barangay sa mga mahitabong kalamidad ug makatabang sa mga molupyo nga maluwas ang kinabuhi ug propedad.

“These equipment for disaster would suffice the need of our municipality in terms of disaster response,” sulti ni Davin atol sa iyang State of the Municipality Address (Soma) niadtong Lunes sa buntag, Hulyo 29.

Giawhag sab niini ang Sangguniang Bayan (SB) nga mo-alokar og dugang pundo aron madugangan ang mga ekipo ug makompleto na ang 22 ka mga barangay.

Gitataw niini nga mahinungdanon sab nga mopailawom sa skills training ang mga opisyal sa barangay aron sila makabaton og kahibalo kon unsaon paghupot ang mga “emergency and rescue operations”.

“Information campaign in the barangays have been continuously conducted to keep the people informed or increase the level of awareness on what to do when natural calamities occur,” niya pa.

Gawas sa mga sakyanan sa kabarangayan, aduna say naka-standby nga tulo ka ambulansya sa munisipyo ug laing tulo ka rescue vehicles aron daling makaresponde panahon sa emerhensiya. (Orlando B. Dinoy)