DAVAO DEL NORTE -- Gikuninitan sa social media ang hulagway sa punoan sa kahoy nga gi-post sa Facebook nga dunay sama sa dugo nga nangagas gikan sa naputol niini nga sanga didto sa lungsod sa Sto. Tomas ning probinsiya.

Ang maong hulagway gi-post sa Facebook sa usa ka Rommel Collena nga miani og 58 ka komento ug upat ka shares.

Si Collena nagbutyag dihang nahinabi sa SunStar Superbalita pinaagi sa messenger nga iyang gi-post ang maong hulagway bisan og atua siya sa Kidapawan City sanglit ang iyang bayaw nga atua sa Sto. Tomas kinsa maoy mikuha sa maong hulagway, nahingangha sa duga nga sama og dugo sa tawo nga nangagas gikan sa naputol nga sanga.

Matud pa nga giputol ang maong kahoy sa dihang gipahigayon ang "clearing operation" sa Davao Light and Power Company (DLPC) sa highway sa Nafco padulong sa Marscon.

Wa masayud sa matuod nga matang sa maong kahoy si Collena apan siya nagtuo nga usa kini ka klase sa Narra nga gitawag og "Bloodwood" nga dunay mogawas nga kolor pula nga duga kung kini maputol.

Ang bise mayor sa Sto. Tomas nga si Erick Stella nagtuo nga ordinaryong kahoy lamang ang gi-post sa Facebook sanglit, sumala pa niya, wa man mabaniog sa lungsod ang maong balita nga dunay kahoy nga mihilak og dugo.

Hinuon, siya sayod nga dunay gihimong "clearing" ang DLPC sa nahisgutang dapit apan wa siyay nabalitaang kahoy'ng mihilak og dugo.