PADAYON ang pagpamatay sa mga baboy sa unom ka apektadong barangay sa Magsaysay, Davao del Sur gumikan sa pagsulod sa African Swine Fever (ASF).

Sa uwahing datos nga gipaguwa sa Municipal Agriculture Office (MAO) niadtong Huwebes, Septyembre 24, mokabat na sa 2,175 ka mga baboy ang na-depopulate.

Matud ni Helen Carampatana, MAO officer sa lugar, apektado ang 384 ka mga hog raisers.

Nahurot sab og pamatay ang kapin gatos ka mga baboy sa Barangay Tagaytay.

Padayong gi-monitor sa MAO ang mga barangay sa Barayong, Balnate Kasuga ug Dalawinon nga adunay presensiya sa ASF.

Nasayran nga aduna say pipila ka mga baboy ang namatay sa Barangay Poblacion, apan sumala ni Carampatana nga huwaton pa ang resulta sa blood samples aron makompirma kung nakasud ba sab sa lugar ang ASF.

Hinuon, 311 na ka mga hog raisers ang natabangan sa lokal nga gobyerno human nabayran og tag P5,940 ang matag usa kanila, apil usa ka sakong bugas.

Gidason ni Carampatana nga wala pa hinuon nameligro ang ekonomiya sa mga nag-baboyan sa lugar sanglit wa pa miabot sa katunga ang mga gipamatay o namatay sa ASF.

Moabot sa 15,000 ang populasyon sa mga baboy sa tibuok lungsod.