KIDAPAWAN CITY -- Nitaas ang ihap sa kaso nga pagpanglugos sa una ug ikaduhang kuwarter sa 2019 sa probinsiya sa North Cotabato, gikompirma ni North Cotabato Provincial Police Office director Colonel Maximo Layugan.

Moabot sa 12 ka kaso ang biktima sa pagpanglugos sa probinsiya karong tuiga, mas taas kung itandi niadtong 2018 sa sama nga panahon.

Apan gitin-aw ni Layugan nga taas karon ang ihap sa lugos gumikan daghan ang nagtaho ug nagsalig sa kapulisan nga kahatagan sila og hustisya.

Samtang duna na say mga kaso nga dugay na nga nahitabo, apan karon lang gipaabot ang reklamo sa mga biktima ngadto sa mga awtoridad.

Kasagaran sa gipanglugos mga menor de edad nga sagad ang mga suspek ila lang nga amahan, ama-ama, ug silingan.

Nanawagan si Layugan sa uban pa nga biktima sa lugos nga dili maulaw nga ipaabot sa kapulisan ang ilang reklamo aron maaksiyonan dayon kini ug madakpan ang mga suspek.