DAVAO DEL SUR -- Sa social media gipagawas sa mga netizens ang ilang kapungot human nga daghan na ang nakagasto tungod sa pagpalit og motorcycle barrier nga upat lamang ka adlaw nga giimplementar.

Kini human gipahibawo ni Joint Task Force Commander Lieutenant General Guillermo Eleazar niadtong Martes, Agosto 18, nga di na kinahanglang mogamit og barrier ang magtiayon ug ubang riders nga nagpuyo lamang sa usa ka balay.

Matud ni alyas Renren, 45, taga Digos City, daw gihimong "trial and error" sa gobyerno ang balaod sanglit nakapalit na ang iyang asawa og barrier aron lang nga di madakpan atol sa ilang biyahe.

Gitataw sab ni Robert nga imbis nga ipalit nila unta og bugas ang maong kuwarta, giuna nila og palit ang barrier nga tag P550 aron lang matuman sa mando.

Gipasibaw sab ni Juliet Menace ang iyang kasagmuyo pinaagi sa social media ug nitataw nga maayong ipakaon ang barrier sa naghimo sa maong balaod ug pataplan ang ilang nagasto.

Samtang daghan sa mga online seller ang apil nga nangasuko tungod kay daghan na ang ilang nakompra niini.

Mga barriers mapalit gikan sa tag P450 ngadto sa P700 ug depende sa klase.

Apan ang uban naghimo lamang og improvised barrier gamit ang karton nga gibutangan og cellophane.

Subay sa mando sa TF-Covid 19, dili na kinahanglan ang barrier sa mga lugar nga gideklarang ilawom sa modified general community quarantine (MGCQ) ug GCQ.

Gikinahanglan lamang nga tag usa ra ang angkas, private ang ilang motor ug nagpuyo sa usa ka balay ug magsul-ob og helmet ug face mask.

Hinuon, mag-depende na sa lokal nga gobyerno kon unsa ang mga pamalaod nga ilang ipahamtang ngadto sa mga motorista sa ilang lugar. (Orlando B. Dinoy)