USA ka kumander sa New People's Army (NPA) ang nadakpan alas 4:50 sa hapon niadtong Martes sa dakbayan sa Kidapawan.

Naila ang suspek nga si Mindaley Satentes, 54, minyo ug nagpuyo sa Midsayap sa North Cotabato.

Gidakop si Satentes sa mga miyembro sa intelligence unit sa 72nd Infantry Battalion, Philippine Army samtang pagawas na unta sa Methodist Center sa nahisgutang siyudad.

Si Satentes giila sab isip Kumander Karla, ilawom sa Guerilla Front Committee 53 sa NPA, nga naglihok sa siyudad ug ubang dapit sa North Cotabato.

Narekober gikan sa posisyon ni Kumander Karla ang usa ka kalibre .45 nga pistola ug mga buhing bala.

Samtang sa mao sab nga adlaw, usa ka 20-anyos nga ulitawo nga giingong kauban ni Satentes ang mitahan sa kaugalingon sa 901st Brigade sa dakbayan.

Gikanayon ni alyas Ricky nga siya nisurender gumikan wala na niya masabtan ang kalihukan sa NPA ug gusto na sab siyang manginabuhi nga malinawon.

Nanawagan ang 72nd IB ug 901st Brigade ngadto sa mga NPA nga mosurender na samtang dili pa ulahi ang tanan ug tabangan sila sa gobyerno. (Edgar E. Fuerzas)