MIABOT sa Davao City alas 8:11 sa gabii, Hulyo 11, 2021 ang patayng lawas ni Airman First Class (A1C) Fortunate Regidor, Philippine Air Force (PAF) flight crew sa C-130 aircraft nga nahagsa sa Barangay Bangkal, Patikul, Sulu, sakay sa NC212i aircraft sa PAF.

Usa ka full military honors nga gipangunahan ni Colonel Jesus Nelson Morales sa PAF ang gihatag ngadto kang Regidor pag-abot niini sa Davao Air Station Headquarters, Tactical Operations Wing Eastern Mindanao (Toweastmin), Barangay Sasa, Davao City.

Dayon gitunol ni Morales ngadto sa iyang asawa ang The Order of Lapu-Lapu Award alang kang A1C Regidor isip pag-ila sa iyang serbisyo ug sakrispisyo alang sa nasud.

Si Regidor usa ka enlisted personnel sa PAF nga na-asign sa 220th Airlift Wing, Loadmaster sa military flights ug usa sa mga seasoned flight crews sa serbisyo.

Miabot sab sa Cagayan de Oro City buntag sa Hulyo 12, 2021 ang patay'ng lawas sa lima ka mga sundalo nga apil sa plane crash.

Sama sa unang batch, gihatagan sab sila og military honors sila Private Firs Class Carlos D. Dapanas Jr., PA sa Manticao Misamis Oriental; Technical Sergeant Nelson B Hadjiri PA sa Kadingilan, Bukidnon; Private First Class Philip Dante T. Camilosa PA nga taga Bit-os, Butuan City; Corporal Jay-ar V Obenita PA taga Lianga, Surigao del Sur; ug Private Carlos Jhun C. Paragua Jr., PA nga taga Manila De Bugabos, Butuan City.

Gikan sa Lumbia Airport gidala ang lima sa kampo sa 4th Infantry Division alang sa overnight vigil ug misa. (Jeepy P. Compio/Toweastmin)