STO. TOMAS, Davao Del Norte -- Balhog sa prisohan ang usa ka mister nga nasakpan nga nagpatari og manok sa Purok 14-B, Barangay Tibal-og, Sto. Tomas alas 9:50 sa buntag niadtong Dominggo.

Ang nadakpan giila nga si Melchor Nadora Cabangbang, 52 anyos, minyo, self-employed ug molupyo sa nahisgutang lugar.

Subay sa report, ang suspek nasikop pinaagi sa kapulisan sa Sto. Tomas Municipal Police Station sa gilusad nga anti-illegal cockfighting operation sa maong dapit.

Nasakmit gikan sa posisyon sa suspek ang duha ka manok pangsabong, usa ka tari ug P300.

Gibutyag nga ang ubang manariay nga mga sugarol nakahimo sa pagpanagan palayo human natimahoan nga nagsingabot ang mga pulis.

Ning kasamtangan, gikustodiya na sa Sto. Tomas Municipal Police Station ang suspek samtang gihikay ang tukmang kaso batok kaniya. (Dexter T. Visitacion)