TAGUM CITY -- Maoy naabtan sa usa ka asawa ang iyang bana nga nagbitay sa kisame sulod sa ilang balay sa Purok 6B, Barangay Apokon, alas 11:00 sa buntag, Sabado, Septiyembre 14.

Ang maong asawa nga ginganlan og Gay Chavez Polison, 45-anyos, molupyo sa nahisgutang dapit, ang miadto sa Tagum City Police Station ug mitaho nga ang iyang bana nga si Roldan Betita Polison, 45-anyos, nagpakamatay sulod sa ilang balay.

Sa gihimong imbestigasyon sa kapulisan, nasayran nga miuli ang asawa sa ilang balay aron sa pagsusi sa iyang bana nga iyang gipaabot pila ka oras didto sa ilang tindahan.

Apan pagsulod sa balay, maoy nadeskubrihan ang biktima nga nagbitay sa kisame nga gihiktan og pisi ang liog.

Daling nanawag og tabang ang asawa ug uban sa iyang bayaw gidala ang biktima sa Davao Regional Medical Center apan gideklara kini sa mga doktor nga dead on arrival.

Usa ka suicide note nga gikan sa biktima ang napalgan ibabaw sa lamesa nga nagpadayag sa kapakyasan ug pagpangayo og pasaylo sa gihimong pagpakamatay.

Ang patay nga lawas sa biktima gipahiluna na sa St. Peter Memorial Services sa Brgy. La Filipina sa maong siyudad.

Walay nakit-an nga foul play ang kapulisan sa kamatayon sa biktima. (Dexter T. Visitacion)