MAPASALAMATON ang Provincial Disaster Risk Reduction and Management Office (PDRRMO) sa Davao Occidental nga wa makahimo og damyos ang kusog nga pagtay-og sa linog niadtong Dominggo sa gabii, Septiyembre 20, 2020.

Sa bulletin nga gipaguwa sa Philippine Institute of Volcanology and Seismology (Phivolcs), natala ang magnitude 5.2 nga linog mga 41 kilometros gikan sa amihanang kasadpan sa lungsod sa Don Marcelino alas 9:28 sa gabii.

Nasayran nga tectonic ang hinungdan sa pagtay-og ug adunay gilawmon nga 175 kilometros. Nasinati sab ang pagtay-og nga Intensity III sa General Santos City, samtang Instrumental Intensity III sa Alabel, Sarangani.

Dugang sa Phivolcs nga way gilaumang damyos apan gi-alerto ang katawhan sa mga aftershocks niini.

Giklaro sab ni Harry Chester Firman Camoro, PDRRMO action officer sa probinsiya, nga wala sila makadawat og taho nga adunay damyos ang maong linog.

Gipahimagnoan ni Camoro ang publiko nga padayong magdoble-igmat sanglit di matagna ang pagabot sa kalamidad.

Sa Davao del Sur, subling nabalaka ang mga kanhi nahimong biktima na sa linog sanglit namatikdan nga nagsugod na sab paglihog ang kayutaan samtang nagkaduol ang buwan sa Oktubre, diin mihapak ang kusog nga mga linog sa Mindanao niadtong 2019.