NAGSININGKAHAY ug nagnilabayay og tsinelas ang magsilingan nga magkumare gumikan sa kaguran nga nawala.

Kini ang gibutyag sa usa ka alyas Alma, 33, nga taga lungsod sa Nabunturan, Davao de Oro, kinsa nahinabi sa SunStar Superbalita Davao.

Matud pa ni Alma nga siya ang nasugoan sa iyang amo nga mopalit og kaguran sa sentrong bahin sa lungsod aron iilis sa kaguran nga nawala nga ang amo niini maoy gipasanginlan nga nakawala.

Gisaysay ni Alma nga sayo sa buntag, Dominggo, Pebrero 5, 2023, gisulong sila sa silingan nga ginganlan og alyas Marites nga nangita sa kaguran nga gihulaman sa iyang amo nga babaye niadtong Kalag-kalag nga wa na mauli ug nalimtan kon asa na nabutang.

Matud pa nga sa sinugdan, niinsister ang amo nga babaye ni Alma nga nauli na ang kaguran niadtong Pasko apan hugot nga miinsister sab si Marites nga wa pa nauli ang kaguran gumikan kay niadtong Pasko ug Bag-ong Tuig wala kini magluto'g biko ug suman mao nga wa nahuna-hunaan ang maong kaguran nga niadto pang Kalag-kalag gihulaman.

Sumala pa nga ang lalis sa magkumare misangko sa siningkahay ug pagnilabayay'g tsinelas ug naundang lang dihang mipataliwa ang amo nga lalaki ni Alma ug misaad nga ilisan ang maong kaguran nga nawala, hinungdan nga gilayong gisugo si Alma aron mopalit og ikapuling kaguran.

Dugang gibutyag ni Alma nga husto ang ilang silingan nga wa pa mauli ang maong kaguran sanglit kay gipahulman diay kini sa amo niyang babaye ngadto sa bayaw niini ug hanagtud karon wa pa mauli.