WALA na kaiktad sa kamot sa kapulisan human masikop ang mag-asawa dihang namaligya og gituohang shabu sa nagtakuban nga pulis atol sa drug bust sa Toril Police Station, Huwebes sa hapon, Oktubre 10, sa Panacan, Davao City.

Si Police Lieutenant Colonel Jed Clamor, hepe sa Toril Police Station, nag-ila sa mga dinakpan nga sila Jumuksin Annuari Musa, 45-anyos ug ang asawa niining si Nisa Padago Musa, 42-anyos, residente sa Panacan ning siyudad.

Mokabat sa P800 mil ang kantidad sa gituohang shabu nga nakuha sa posisyon sa mag-asawa.

Sumala ni Clamor nga sagad taga Toril ang mga payokyano sa mga dinakpan kini makonsidera nga mga high-value target (HVTs) ang mga suspek tungod na usab sa dakong kantidad sa shabu nga nakuha sa ilang posisyon.

Niining kasamtangan, balhog karon ang mga dinakpan sa Toril PNP ug nakatakdang pasakahan og kasong pagsupak sa RA 9165 kon Comprehensive Dangerous Drug Act of 2002. (Jeepy P. Compio)