DAKONG kuwarta sa druga kung wala masakpi sa awtoridad.

Kini ang giluwatan nga pahayag sa mag-asawang Cairodin ug Juliet Hassan human sila masikop sa operatiba sa Sta. Ana Police Station atol sa gilusad nga drug bust alas 9:50 sa gabii niadtong Miyerkules sa Purok Ubas, Phase I, S.I.R, Sandawa, Brgy. 76-A, Davao City.

Miabot sa katorse ka mga nagkadaiyang pakite sa gituohang shabu nga dunay street value nga P225,000 ang nakuha gikan sa posisyon sa mga dinakpan.

Matud ni Chief Inspector Michael Uyanguren, hepe sa Sta. Ana PNP, nga dugay na nilang gipanid-an ang lihok sa mag-asawa hinungdan nga mihimo sila og test buy diin nagpositibo ang magtiayon nga tigpayuhot.

Tungod niini nagpahigayon dayon sila og drug bust hinungdan nga nalit-ag ang mag-asawa.

Kasong pagsupak sa Republic Act 9165 kun Comprehensive Dangerous Drug Act of 2002 ang ipasaka nga kaso batok sa mga dinakpan.