TACURONG CITY -- Patay ang usa ka dalaga sa pagpamusil alas 8:10 sa gabii niadtong Mayo 25 sa siyudad sa Tacurong.

Giila ang biktima nga si Sarah Jean Pendatun, 28 anyos, budget officer sa Provincial Government sa Maguindanao.

Sa taho gikan sa Sultan Kudarat Police Provincial Office nga samtang panaog ang biktima sa iyang gisakyan nga traysikel sa Barangay Poblacion, Tacurong City pauli sa iyang balay, kalit lang mibutho ang duha ka wala mailhing tawo ug gipusil kini gamit ang kalibre .45 nga pistola.

Abtik sab nga miikyas ang mga suspetsado sakay sa motorsiklo paingon sa hilit nga dapit sa dakbayan sa Tacurong.

Dead on the spot ang biktima nga naigo sa iyang ulo ug likod nga parte sa lawas niini.

Daghan ang nagtuo nga posibleng dunay kalabutan sa trabaho sa dalaga ang motibo sa pagpatay.

Gikondena sab ni Maguindanao Governor Bai Mariam Sangki-Mangudadatu ang pagpatay sa biktima.

Sa kasamtangan, ang kapulisan sa Tacurong City ang padayon nga nag-imbestiga sa pagpamusil-patay kang Pendatun. (Edgar Fuerzas)