WALAY kabutangan sa kalipay sa mga residente sa pipila ka mga barangay sa Sta. Maria, Davao Occidental nga biktima sa pagbaha sa milabay nga semana.

Biyernes, Nobiyembre 25, 2022, mokabat sa kapin kun kalang 2,500 ang mga benepisyaryo ang nakahimulos sa Assistance to Individuals in Crisis Situations (AICS) program sa Department of Social Welfare and Development (DSWD).

Ang mga benepisyaryo nakadawat og tag P2,000 matag usa ug nakadawat sab sila og mga grocery package, mga tambal ug bitamina gikan kang Senador Christopher 'Bong' Go didto Sta. Maria Municipal Covered Court.

Nalingaw ang mga taga Sta. Maria dihang uban ni Senador Go si Senador Robin Padilla ug ang aktor nga si Philip Salvador o mas nailhang "Epi" sa mga sikat nga pelikula niini.

Nagpasiaw sila agi'g paghatag og kalingawan sa mga taga Sta. Maria, diin mga bola ang gipanghatag ingon man mga daghag pa-raffle sama sa mga sapatos, mga bike ug mga relo.

Dako ang pasalamat ni Senador Go sa taga Sta. Maria sa padayong suporta nga gihatag kaniya, diin suma niini, iya kining ibalik pinaagi sa pagdalit og serbisyo pinaagi sa Malasakit Center ug ubang mga programa diha sa munisipalidad. (Jeepy P. Compio/Edith Isidro, PIA-Davao)