GIPROKLAMA na ang mga nidaug nga kandidato sa siyudad sa Cotabato, Martes, Mayo 14.

Giproklama sa City Board Canvassers si incumbent Cotabato City Mayor Frances Cynthia Guiani Sayadi nga mananaug batok kang Maguindanao First District Representative Bai Sandra Sema.

Nagpasalamat si Sayadi sa mga nisuporta, niboto ug nisalig kaniya nga dumalahon ang dakbayan.

Giproklama na sab si Nazer Dumama isip bise mayor.

Ang mga city councilors mao sila Japal Guiani III, Bruce Matabalao, Dr. Eddie Rabago, Johari Abu, Michael Datumanong, Abdillah Lim, Popoy Formento, Hassan Biruar, Freddie Ridao, ug Christina Chua.

Kahinumdoman nga una nang gibabagan ni Sayadi nga mahiapil ang Cotabato City sa Bangsamoro Autonomous Region in Muslim Mindanao (Barmm).

Naghangyo si Sayadi sa iyang mga kaatbang nga magtinabangay na lamang alang sa kalinaw ug kalamboan sa siyudad ug kalimtan na ang away sa politika. (Edgar E. Fuerzas)