MALAMPUSONG naluwas ang usa ka lalaki human nalubong ilawom sa tunnel og dul-an 14 ka oras sa Barangay Mainit, Nabunturan, Davao de Oro.

Ang biktima mao si Alvin Bermaba, 28, minero ug molupyo sa Purok 12, Barangay Mainit sa nahisgutang lungsod.

Sa pakighinabi kang Jun Pequero, radio operator sa lokal nga panggamhanan sa Nabunturan, gibutyag niya sa SunStar Superbalita nga nakadawat sila og taho nga dunay nahugno nga tunnel alas 11:46 sa buntag, Hulyo 8, 2021.

Daling girespondehan ang lugar pinaagi sa mga personahe sa Bureau of Fire Protection , Philippine Red Cross, opisina sa Municipal Engineer's ug Nabunturan Emergency Response Team.

Mitabang sab ang mga molupyo sa pagpanguna sa mga opisyal sa Barangay Mainit aron nga makalot ang biktima nga atua ilawom sa yuta.

Ala 1:10 na sa kaadlawon, Hulyo 9, dihang naugkat ilawom sa yuta ang biktima human ang dul-an 14 ka oras nga kombati sa mga responders.

Gidali ang biktima paghatud ngadto sa Davao De Oro Provincial Hospital sa lungsod sa Montevista.

Base sa inisyal nga imbestigasyon, ang biktima uban sa tulo niya ka mga kauban misulod sa nahisgutang tunnel kon diin nanguna mismo ang biktima.

Sa dihang namatikdan nila nga dunay liki ang yuta sud sa tunnel, nagdali silang nanggawas apan ang biktima nga maoy naulahi maoy naabtan pagkahugno sa yuta.

Ang tulo niyang kauban wala masamdi atol sa maong insidente.