DUHA ka lalaki ang giingong miikyas gikan sa Digos City District Jail diin ang usa kanila napusilan-patay samtang ang usa samaron ug anaa karon sa ospital.

Nakugang ang mga residente sa Luna Extension sa Digos City dihang milanog ang mga buto sa armas human gipanggukod sa mga jail guards ang duha ka priso nga miikyas alas 12 sa udto Martes, Marso 27.

Sa inisyal nga impormasyon nga gipadala ni Senior Superintendent Samuel Gadingan, director sa Davao del Sur Police Provincial Office, sa SuperBalita, nasayran nga napatay ang usa samtang samaron ang usa kinsa dali ra sab nga nasikop.

Ang napatay si Tiwan Pino Bakotal, 22, nagpuyo sa Barangay Datu Danwata, Malita, Davao Occidental kinsa dunay kasong murder samtang ang samaron si Digan Gampong Meroy, 22, nagpuyo sa Barangay Kapatagan, Digos City nga dunay kasong homicide.

Sumala ni Superintendent Deozar Almasa, hepe sa Digos City Police Station, nga milukso sa kural ang duha apan nakita sa jail guard mao nga gipanggukod dayon gi-niyutralisa hinungdan nga napatay ug naangol ang usa.

"Both were shot by BJMP personnel while fleeing. Meroy was hit in the leg while Bakotal was hit at the front portion of his body and later declared dead by attending physician," text message ni Almasa.

Sa hitabo, ang Bureau of Jail Management and Penology (BJMP)-Davao Region padayong naghulat sa opisyal nga report gikan sa Digos City District Jail aron ilang mahan-ay ang ilang imbestigasyon.

"As of now, Digos City District jail is conducting already an investigation about the aborted escape of two inmates. I don't want to speculate about the said incident. I am still waiting for the reports of Digos City District Jail to BJMP regional office," mensahe nga gipadala ni BJMP-Davao Region spokesperson Jail Inspector Edo Lobenia.