SA UNANG semana sa election period ug sa pagpatuman sa election gun ban, ubay-ubay na sab ang nadakpan sa kapulisan sa Davao Region.

Subay sa datus nga gipagula sa kapulisan sa rehiyon sukad Enero 13 hangtud Enero 20 ning tuig, pito na ka mga gun ban violators ang nadakpan.

Tulo ang namatay sa mga operasyon sa kapulisan ug siyam ka mga armas ang nakumpiska apil na ang 256 ka mga bala.

Magpadayon ang mga checkpoint sa mga entrada sa siyudad ug mga nagkalain-laing lugar sa tibuok rehiyon.

Ang mga nadakpan mag-atubang og patong-patong nga kaso, sama na lamang sa illegal possession of firearms and ammunition ug paglapas sa balaod sa Comelec.

Nanawagan usab ang kapulisan sa katawhan sa pagkooperar sa maagihan nila nga mga checkpoint kay kining tanan ginabuhat alang sa proteksyon sa katawhan sa Davao City ug sa kinatibuk-ang Davao Region. (Richy F. Nalagon)