DAVAO DEL SUR -- Nangandam na ang Commission on Elections (Comelec) alang sa pagahimuong mock elections adlaw’ng Sabado, Enero 19.

Sumala ni abogada Maria Febes Barlaan, acting assistant director sa Comelec-Davao Region nga 26 ka mga dapit lamang sa nasud ang mopahigayon og mock elections.

Dinhi sa Mindanao, himuon ang mock polls sa mga dapit sa Dapitan City, Sergio Osmeña Sr., sa Zamboanga del Norte; Sergio Osmeña Sr., Digos City, Bansalan, Davao del Sur; General Santos, Surallah, South Cotabato; Jolo, Sulu; Lamitan ug Sumisip sa Basilan.

Gitakdang sugdan gikan alas 5 sa buntag hangtud ala 1 sa hapon ang mock elections ug adunay mga personahe sa Comelec-Manila ang moabot dinhi.

Sumala ni Barlaan nga mahinungdanon ang mock polls sa maong mga dapit aron masuta ang signal niini una moabot ang Mayo 13, nga midterm elections.

Samtang, nagtagbo sab ang mga hepe sa kapulisan ug mga opisyal sa Police Provincial Office ning probinsiya ug mga election deputies and stakeholders sud sa Sangguniang Panlungsod sa siyudad sa Digos niadtong Miyerkules, Enero 16.

Gipahigayon nila ang first Provincial Coordinating Conference alang sa taliabot nga piliay diin gihisgutan ang mga lakang sa seguridad alang sa maong adlaw.