TACURONG CITY -- Patay ang drayber sa pampasaherong multicab og 20 ka pasahero ang naangol sa disgrasya sa kadalanan alas 6 sa buntag niadtong Lunes, Disyembre 17.

Ang namatay mao si Ronald Espulgar Lanuevo, nagpuyo sa Purok Ilang-ilang, Barangay Tina sa nahisgutang dakbayan.

Sa taho gikan sa Sultan Kudarat Police Provincial Office, nasayran nga sakay ang mga biktima sa multicab sa Barangay Impao, Isulan sa diha nga kalit silang gibanggaan sa kasugat nga Bonggo type nga sakyanan.

Tungod sa kakusog sa impak sa disgrasya, samdan tanan ang sakay sa multicab nga pulos gipangdala ngadto sa Sultan Kudarat Provincial Hospital.

Apan patay na dihang nahidangat sa tambalanan ang drayber sa multicab nga si Lanuevo.

Ang 20 ka mga samaron nagpaalim na sa ilang mga naangkon nga samad ug pangos sa lawas sa ospital. (Edgar E. Fuerzas)