DAVAO DE ORO -- Nahimong gubot ug nakamugna og kasaba sa sayong kabuntagon human nga magsilingan nagkalalis tungod sa iring sungkaban.

Ang insidente nahitabo niadtong Martes, Hulyo 28, 2020, sa barangay sakop sa usa ka lungsod ning probinsiya.

Sa gihimong pakighinabi sa Superbalita Davao kang alyas May-May, 16, iyang gisaysay nga tungod sa iring sungkaban, nagkalalis ug nag-away ang iyang iyaan ug uyoan, hinungdan nga milakaw sila sa iyang iyaan aron magpawala sa kasuko.

Gibutyag ni May-May nga sayo sa buntag sa maong adlaw, gisulong sa iyang iyaan ang ilang silingan nga maoy gipasanginlan nga tag-iya sa iring nga kanunay manungkab sa ilang kusina.

Matud pa nga miulbo ang kasuko sa iyaan ni May-May dihang sa pagmata niini, mao nay misugat sa iyang panan-aw ang nayabo nga butanganan sa gilutong paksiw nga isda ug nawagtang na kini sa kusina.

Gisulong sa iyang iyaan ang balay sa silingan ug nagkalalis apan giapas ang iyang iyaan sa iyang uyoan ug gibadlong.

Apan inay nga mopatuo, nasuko hinuon ang iyang iyaan ngadto sa iyang uyoan, hinungdan nga sila na naglalis.

Misamot pa gyud ang ilang away, dihang sa atubangan sa silingan nilang babaye kinsa maoy giingong tag-iya sa iring sungkaban, giingnan sa iyaan ang iyang bana nga duna silay relasyon sa maong silingan.

Nasuko ang bana, hinungdan nga gibunlot niini ang iyang asawa ug gipapauli.

Sa kalagot sa iyang iyaan, sa pagtuo nga nidapig ang iyang bana sa silingan, milakaw kini kauban si May-may ug mibilin pa'g pulong sa bana sa pagbiya, "Pag-uban mo diha sa imong didang."

Gikaguol ni May-May ang nahitabo ug naghinaut nga maulian na sa kasuko ang iyang iyaan ug makauli na sila sa ilang balay sanglit nabalaka siya nga sa tantong luod-luod niini, makasugat pa hinuon sila og tawo nga positibo sa coronavirus disease 2019 ug mataptan tungod lang sa iring sungkaban nga maoy hinungdan sa away.