NADAKPAN na ang suspek nga nanigbas patay sa 2 niya ka kainom alas 8:05 sa gabii, Lunes, Agosto 29, 2022, sa Alamada, Cotabato Province.

Giila ang mga biktima nga sila Rolando Salcedo, 56, ug Felix Arigola, 74, nga mga molupyo sa Sitio Baing, Barangay Barangiran, Alamada.

Samtang ang suspek giila nga si Richel Nikor, 33, kinsa giingong umagad sa usa sa biktima nga si Salcedo.

Giingong si Nikor gibuwagan sa iyang asawa tungod kay matud pa iresponsable sa pamilya ug kanunay lang mahubog.

Sa taho gikan sa Alamada Municipal Police Station, nag-inom ang mga biktima ug suspek duol lang sa ilang panimalay.

Apan sa dihang nahubog na si Nikor, gikuha niya ang iyang sundang ug gipangtigbas ang duha ka mga tigulang.

Daling gidala sa balay tambalanan ang mga biktima apan nakabsan gihapon kini sa mga kinabuhi.

Sa follow-up operation sa kapulisan, ingon man sa mga sakop sa Barangay Peacekeeping Action Team (BPAT), nadakpan ang suspek ug gitakdang pasakaan og kasong double murder samtang nagtingkagol sa prisohan sa Alamada Municipal Police Station.