GINASUBAY na sa kapulisan aron sikupon ang lalaki nga nakuhaan sa closed-circuit television (CCTV) camera nga miitsa og sudlanan og pulbos nga dunay shabu sud sa compound sa Davao City Jail sa Maa, Davao City niadtong Sabado, Hulyo 17, 2021.

Subay sa kuha sa CCTV, naniid pa ang lalaki sa palibot ug pagkataud-taod, mihunat kini og labay sa sudlanan sa bulbos padung sa sulod sa compound.

Dihang gisubay sa mga personahe sa Bureau of Jail Management and Penology (BJMP), nasuta nga usa ka butanganan og pulbos nga dunay unod nga upat ka mga pakite sa gituohang shabu nga mokantidad og P186,000 ang narekober.

Gibutyag ni BJMP-Davao Region Spokesperson Edo Lobenia nga mas istriktuhon pa nila ang pagbantay sa palibot sa prisohan aron di kasulod ang mga dautang butang.

Wala pa sab nasayran sa mga personahe sa Davao City Jail kinsa ang piniriso nga posible unta nga modawat sa maong druga sa sulod.