DAVAO DE ORO -- Walay piyansa nga gitugot ang korte sa kaso sa suspek nga pinangita ning probinsya apan didtoa nadakpan sa Purok 6, Barangay 18-Obrero, Butuan City.

Ang suspek mao si John William Mondaya Baruiz, 26 anyos, dunay kapuyo ug molupyo sa Purok 1, Barangay Bading, sa Butuan.

Sa report nga nakuha gikan sa Davao De Oro Police Provincial Office, nasayran nga alas 6:30 sa buntag, Sabado nagpahigayon og manhunt Charlie operation ang mga kapulisan sa New Bataan inubanan sa mga personahe sa Police Station 2 sa Butuan City Police Office nga miresulta sa pagkasikop sa suspek sa maong dapit.

Ang pagdakop kang Baruiz subay sa warrant of arrest nga giisyo ni Carmel G. Grado, presiding judge sa Regional Trial Court (RTC) Branch 56, Compostela, Davao De Oro, nanukad sa kasong rape nga may criminal case number 09-2020 NWB/FC ug 10-2020 NWB/FC, nakapetsa Pebrero 17, 2020.

Ang maong dinakpan gikustodiya sa New Bataan MPS samtang gipaabot ang sunod mando sa korte. (Dexter T. Visitacion)