NAKAHIAGOM og daghang mga samad pinusilan ang lawas sa 17-anyos nga ulitawo human pusila sa wala mailhing armado sa Purok 13, Barangay Manay, Panabo City sa alas 7:50 sa gabii, Miyerkules, Pebrero 8, 2023.

Ang biktima mao si Jason Galos Ayco alias Dagol, out-of- school-youth, construction worker ug molupyo sa nahisgutang dapit.

Base sa insiyal nga imbestigasyon, nasayran nga ang biktima tua sa ilang balay dihang niabot ang duha ka wala mailhing mga suspek nga giingong nag-angkasay sa kolor pula ug puti nga Honda CRF nga walay plaka.

Matud pa nga ang nakaangkas nga suspek, nikanaug gikan sa motor ug nipadulong sa balay sa biktima dayong nanuktok sa pultahan.

Sa dihang giablihan na, gipusil niini ang biktima sa makadaghang higayon gamit ang wa matinong kalibre sa armas.

Daling gidala ang biktima sa mga silingan ngadto sa Carmen District Hospital samtang mga suspek nagdaling mikagiw sa wala masayring direksiyon.

Sa gihimong imbestigasyon sa kapulisan sa Panabo City Police Station, gihulagway sa igsuon sa biktima kinsa maoy nakasaksi sa hitabo nga ang suspek nga nagsilbing drayber dunay gitas-on nga 5'2" , niwangon, nagsul-ob og itom nga jacket, kalo ug tube mask samtang ang gunman anaa sa gitas-on nga 5'6", niwangon sab, nagsul-ob og kolor grey nga jacket, kalo ug tube mask.

Nasuta nga nakahiagom ang biktima og duha ka samad pinusilan sa bahin sa ulo, usa sa walang bahin sa dughan, usa sa tuong bukton ug usa sa wala nga paa.

Gibalhin ang biktima pagdala ngadto sa Davao Regional Medical Center sa siyudad sa Tagum alang sa dugang medikasyon.

Narekober sa kapulisan gikan sa crime scene ang walo ka basiyo sa bala sa gituohang 9mm nga armas.

Motibo sa pagpamusil, apil na ang mga bansagon sa mga suspek padayon pa nga gisuta sa kapulisan sa gihimo nilang imbestigasyon.