NADUGANGAN ang mga bakwit nga nagsuka-suka ug kalibanga sa usa sa mga tambalanan ning lungsod sa Bansalan, Davao del Sur.

Naabtan sa SunStar Superbalita, Sabado sa buntag, Marso 7, ang pasyenteng si Rembert Buenavilla, 19, taga Barangay Barayong Magsaysay, Davao del Sur, nga na-admit sa Viacrusis Medical Hospital, human di na maaguwanta ang panakit sa tiyan nga miresulta sa kalibanga ug kalintura.

Susamang sakit sab ang gihambin ni Mercelita Cueme, 36, residente sa Barangay San Isidro, Magsaysay nga nawad-an pa og gana sa pagkaon.

Gibutyag niini nga bomba ang tinubdan sa ilang tubig apan di siya makatuo nga kini maoy hinungdan sa iyang sakit sanglit tin-aw ang agas sa tinubdan.

“Posible natakdan lang ko kay naa man pod mga nagsakit sa among lugar,” niya pa.

Apan ang 7-anyos nga si Ryan, taga Barangay Tagaytay sa samang lugar, na-admit tungod sa cholera.

Gumikan niini, subling nagpahimangno ang Municipal Health Office sa ilang mga molupyo nga kanunayon ang paglimpyo sa palibot.

Kinahanglan sab ang paghugas og kamot una mokaon ug segurohong di matugpahan og langaw ang pagkaon.

Niadtong Biyernes, nakigtagbo ang mga personahe sa Philippine Red Cross kang Mayor Arthur Davin aron sutaon ang sitwasiyon ug masegurong kanunay adunay rasyon sa tubig alang sa mga dapit nga naguba ang tinubdan sa suplay human sa sagunsong linog sa miaging tuig. (Orlando B. Dinoy)