KASUBO karon ang gibati sa mga kabanay sa 66-anyos nga lalaki human naigo sa kilat didto sa Sitio Pangi, Barangay Basiawan sa Sta. Maria, Davao Occidental.

Patay na sa dihang naabtan sa mga sakop sa Municipal Disaster Risk Reduction and Management Office ang 66-anyos nga mag-uuma.

Nakita nga grabeng pagkapaig sa lawas sa biktima ug nakahab pa ang yuta sa kakusog sa kilat diin asa nagtindog ang biktima.

Nasayran nga ulan niadtong mga orasa diin nagpasilong ang biktima sa usa ka barong-barong nga dunay kahoy, dihang sa kalit na lang mikilat dayon miigo sa biktima.

Sumala sa Municipal Disaster Risk Reduction Management Office, sayo pa sa buntag nakasinati na og pag-ulan ang lugar.

Nagpadala na sab og hinabang ang lokal nga panggamhanan sa Sta. Maria pinaagi ni Mayor Josephine Mariscal ngadto sa pamilya sa biktima.