KIDAPAWAN CITY -- Nagtuo ang kapulisan nga away sa negusyo ang motibo sa pagpatay sa usa ka negusyante nga giingong dugay nang nakadawat og hulga sa kinabuhi.

Si Rodolfo Navarta Pioquinto, 57, ug tag-iya sa Rodencar Hardware and Construction Supply sa Barangay Sangat, M’lang sa North Cotabato ang gipusil alas 3:30 sa hapon, Huwebes, Marso 21.

Sumala sa taho gikan kang Superintendent Bernard Tayong, tigpamaba sa North Cotabato Police Provincial Office, nga gipusil ang biktima samtang nagtindog atubangan sa iyang hardware store sa usa ka nakamaskara ug nakakalo nga mamumuno nga nagpakaaron-ingnon nga kustomer.

Si Pioquinto nga naigo sa ulo ug dughan, patay on the spot samtang ang suspek daling miikyas gikan sa lugar ug wala na maabti sa nagrespondeng mga miyembro sa Barangay Peacekeeping Action Team (BPAT).

Nasayran nga ang biktima daghan nang nadawat nga hulga sa kinabuhi base sa natala nga mga blotter sa M’lang Municipal Police Station. (Edgar E. Fuerzas)