DAW mora'g eksena sa pelikula ang nahitabo sa usa ka lalaki kinsa naputlan og duha ka mga tiil human nga aksidente nga nahulogan sa natanggal nga container van didto sa Coastal Road, Barangay San Pedro, Panabo City, Davao del Norte alas 6 sa buntag, Dominggo, Abril 16, 2023.

Sa impormasyon gikan sa Panabo Police Station, ang biktima nailhang si Lawrence Anthony Gregorio, hamtong ang pangedaron, nagpuyo sa Purok Humayan, Barangay Datu Abdul, Panabo City.

Nailhan sab ang drayber sa prime mover nga si Andrew Ganaban Cancio, hamtong sab ang pangedaron ug residente sa Purok 4, Barangay A.O Floirendo 13, Barangay San Vicente, Panabo City.

Sa report, nasayran nga padulong sa Davao City ang direksiyon sa truck samtang ang lalaki nag-jogging sa pikas nga bahin sa kalsada.

Apan sa pag-abot sa trak sa kurbadang bahin, aksidente nga natanggal ang container van nga karga niini ug napadulong ngadto sa lalaki nga nag-jogging.

Diha dayon, perteng putola sa duha ka mga tiil sa biktima ug gipanghipos sab kini dayon human nga na-imbestigahan sa kapulisan sa Panabo police.

Sa usa ka hulagway nga mikatag sa social media, makita nga gipamunit sa taga punerarya ang duha ka putol nga tiil nga naka-sapatos pa.

Luyo niini, daghan ang nasubo sa gidangatan sa biktima kinsa padayong anaa sa usa ka tambalalan human nga daling na-rescue sa Panabo City Disaster Risk Reduction Management Office.

Sa pagsuwat ning balita Lunes, wala pa napagawas ang medical bulletin sa biktima.

Hinuon gilayong mitahan sa kapulisan ang drayber sa trak. Gina-proseso na sab karon ang pagtabang sa management nga nanag-iya sa trak ngadto sa biktima.