ANG mga otoridad sa Davao Region nagmando na sa ilang mga station commander ug mga chief of police sa tanang istasyon sa kapulisan nga ipatuman ang 'No backpack policy' sa tanang aktibidad sa Semana Santa.

Kini ang gibutyag ni Police Regional Office (PRO)-Davao Region director Police Brigadier General Marcelo Morales kini subay sa gipatuman nilang hugot nga seguridad dinhi sa Davao City ug sa kinatibuk-ang rehiyon.

“We have already coordinated with the parishioners and sa mga parish priests nga tumulong sa pag-iimplement sa 'No Backpack Policy' sa lahat ng mga pupunta sa mga simbahan at even doon sa sasali sa mga prusisyon. We will request for the understanding ng mga devotees dahil ang pag-implement namin nito ay para sa kapakanan ng lahat,” ingon ni Morales sa pakighinabi sa mga tigbalita.

Sa laing bahin, si Davao City Police Office (DCPO) Director Alexander Tagum nagbutyag nga hugot gayod nilang gipatuman ang maong palisiya ug nagmuntar sila og mga baggage counters sa mga simbahan.

Gikumpirmar sab ni Task Force Davao Colonel Consolito Yecla nga giuyunan ni Davao City Archbishop Romulo Valles ang ilahang request nga transparent bottled waters lamang ang mamahimong dalhon sa mga aktibidad.

Kapin 4,000 ka mga personahe gikan sa mga nagkadaiyang law enforcement units ang gipakatap atol sa send-off ceremony sa DCPO grounds.

Target sa mga awtoridad ang zero incidence karong Semana Santa.