USA ka online meeting ang gipahigayon sa mga opisyales ning probinsiya sa pagpanguna ni Governor Jayvee Tyron Uy kauban ang mga department heads ug uban pang mga miyembro sa executive committee sa Provincial Government of Davao de Oro.

Matud pa nga gihimo ang maong online meeting adlaw'ng Biyernes, Marso 27, 2020, sa tinguha nga malikay sa dakong panagtapok ang maong mga opisyal ug padayong ma-obserbar ang polisiya sa social distancing.

Gikabutyag nga bisan og lagyo sa usa'g usa, naningkamot ang maong mga opisyales nga ma-update ang usa'g usa sa dagan sa kalihokan nga may kalabutan sa Covid-19.

Sumala pa nga na-istoryahan sa maong meeting ang pagpang-apud-apod sa mga relief goods sa mga residente kinsa labing naapektuhan sa gipatumang community quarantine.

Lakip sa nahisgutan ang pagpakusog sa koordinasyon sa matag munisipyo ug ka-barangayan, padayong pagsirado sa utlanan ning probinsiya samtang gipahigayon ang regional lockdown ug ang kaayuhan sa mga empleyado sa Kapitolyo ning panahon sa krisis sa Covid-19.

Ning kasamtangan, padayong naka-red alert ang tibuok probinsiya sa Davao de Oro kontra Covid-19 luyo sa gipatumang Community Quarantine sa matag munisipyo ning probinsiya. (Dexter T. Visitacion)